Honakoa Lesakako Udal Artxiboko webgunea da. Bertan ikusi ahal dira artxiboan gordetzen diren espediente historikoak; bai eta herriaren argazki bilduma ere.
Espedienteei dagokienez, gure artxiboan zehazki 1527 urtean hasi eta gaur egun bitarteko dokumentuak gordetzen dira. Webgune honetan baina, bilatu daitezkeen edukiak historikoak dira; erran nahi baita: 75 urte baino zaharragoak direnak. Gainera, aipatu agiri eta argazkiekin batera dokumentu zaharrenen digitalizazioak aurkituko dituzue, hala nola jaietako programa eta akta liburuak, errate baterako. Webgunean bertan irakurri eta webgunearen bidez deskargatu daitezke horiek.
Ordea, espediente originalak ikusteko eskaera orria bete behar da, dela udalaren egoitza elektronikoan dela presentzialki Lesakako Udaleko bulego orokorretan. Nahiz eta aurretik telefonoz deituta ere (948637005) hitzordua hartzeko aukera izan. Kontsultatu nahi diren espedienteak prest izatean, artxibozainak harremanetan jarriko da kontsulta egin duenarekin.
Edonork argazki bildumara ekarpenak egin ahal ditu bi modutan: argazki zehatz bati buruz informazioa gehituz edo bere argazki zaharrak partekatuaz. Horretarako web orrian bertan dagoen inprimakia bete beharko du interesdunak. Behin argazki-bildumaren arduradunak eduki berri hori aztertu eta egokitzat joz gero baino ez da argitaratuko. Modu honetara jasotako argazki guztiak web orrian modu irekian aurkeztuko dira.
